നവാഗതരുടെ പ്രിയപ്പെട്ട മെഗാ സ്റ്റാർ സൃഷ്‌ടിച്ച അപൂർവ റെക്കോർഡ്!

നവാഗത സംവിധായകരെ പ്രോത്സാഹിപ്പിക്കുന്ന നടന്മാരിൽ എക്കാലവും മുന്നിലാണ് മമ്മൂട്ടിയുടെ സ്ഥാനം. ലാൽജോസ്, ബ്ലെസി, അൻവർ റഷീദ്, മാർട്ടിൻ പ്രക്കാട്ട്, അമൽ നീരദ്, ആഷിഖ് അബു, വൈശാഖ് തുടങ്ങി മലയാള സിനിമയിലെ മുൻ നിര സംവിധായകരിൽ പലരും മമ്മൂട്ടിച്ചിത്രങ്ങളിലൂടെ അരങ്ങേറ്റം കുറിച്ചവരാണ്. 2018 ൽ മമ്മൂട്ടി അഭിനയിച്ച എല്ലാ സിനിമകളും ഒരുക്കിയത് നവാഗത സംവിധായകരാണ് എന്ന അപൂർവതയുമുണ്ട്. ഷാമ്ദത്ത് (സ്ട്രീറ്റ് ലൈറ്റ്‌സ്), ശരത്ത് സന്ദിത്ത് (പരോൾ), ഗിരീഷ് ദാമോദർ (അങ്കിൾ), ഷാജി പാടൂർ (അബ്രഹാമിന്റെ സന്തതികൾ), സേതു (ഒരു കുട്ടനാടൻ ബ്ലോഗ്) എന്നിവരുടെ ആദ്യ സംവിധാന സംരഭങ്ങളിൽ മമ്മൂട്ടി നായക വേഷത്തിലെത്തി. പ്രജേഷ് സെൻ എന്ന നവാഗത സംവിധായകൻ ഒരുക്കിയ ക്യാപ്റ്റൻ എന്ന സിനിമയിൽ അതിഥി വേഷത്തിലും മെഗാ സ്റ്റാറിന്റെ സാന്നിധ്യം ഉണ്ടായി. ഇത്രയധികം സംവിധായകരെ ഒരേ വർഷം സിനിമയ്ക്ക് പരിചയപ്പെടുത്തിയ നടൻ എന്ന അപൂർവ നേട്ടം കൂടി സ്വന്തമാക്കിയിരിക്കുകയാണ് മമ്മൂട്ടി. ലോകസിനിമയിൽ തന്നെ ഏറ്റവും അധികം പുതുമുഖ സംവിധായകരെ പരിചയപ്പെടുത്തിയ നടൻ മമ്മൂട്ടി ആയിരിക്കാം.