പേരൻപ് സൃഷ്ട്ടിച്ച ആവേശം നിലനിൽക്കേ യാത്ര എത്തുന്നു

‘ആനന്ദോ ബ്രഹ്മ’ എന്ന സൂപ്പര്‍ഹിറ്റ് ചിത്രത്തിനു ശേഷം മഹി വി രാഘവ് സംവിധാനം ചെയ്ത യാത്ര നാളെ പ്രദർശനത്തിന് എത്തുന്നു.ആന്ധ്രയിൽ കോൺഗ്രസിന്റെ രണ്ടാംവരവിന് കാരണക്കാരനായ വൈ.എസ്. രാജശേഖര റെഡ്ഡി എന്ന ജനകീയ നേതാവിന്റെ ജീവിതമാണ് സിനിമയുടെ ഇതിവൃത്തം.2003ൽ അസംബ്ലി തിരഞ്ഞെടുപ്പിന് മുന്നോടിയായി, ഏപ്രിൽ- മേയ് മാസങ്ങളിൽ ആന്ധ്രയുടെ ഗ്രാമങ്ങളിലൂടെ 1475 കിലോമീറ്റർ വൈ.എസ്.ആർ. സഞ്ചരിച്ചു.വൈ.എസ്.ആറിന്റെ 68 ദിവസത്തെ യാത്ര ആന്ധ്രയിൽ കോൺഗ്രസിന്റെ തിരിച്ചുവരവിന് കാരണമായി. 2004ൽ ആന്ധ്രയിലെ അസംബ്ലി, പാർലമെന്റ് തിരഞ്ഞെടുപ്പുകളിൽ കോൺഗ്രസ് നേടിയ വിജയം കേന്ദ്രത്തിൽ പാർട്ടിയുടെ തിരിച്ചുവരവിന് കാരണമാവുകയും ചെയ്തു.സിനിമയും രാഷ്ട്രീയവും ഇടകലർന്നുനിൽക്കുന്ന ഒരു ഭൂമികയിൽ യാത്ര പോലെ ഒരു ചിത്രം വലിയ ചലനം സൃഷ്‌ടിക്കുമെന്നാണ് കരുതപ്പെടുന്നത്. മമ്മൂട്ടി തന്നെയാണ് തെലുങ്കിൽ ഡബ്ബ് ചെയ്തിരിക്കുന്നത് എന്നത് പ്രത്യേകതയാണ്. ഇടവേളയ്ക്ക് ശേഷം മമ്മൂട്ടി തമിഴിൽ അഭിനയിച്ച പേരൻപ് പ്രേക്ഷകർ ഇരുകയ്യും നീട്ടി സ്വീകരിച്ചിരിക്കുമ്പോഴാണ് മറ്റൊരു അന്യഭാഷാ സിനിമയിലൂടെ മലയാളത്തിന്റെ മഹാനടൻ വീണ്ടും പ്രേക്ഷകരെ വിസ്മയിപ്പിക്കാൻ എത്തുന്നത്