കോടികൾ വാരിക്കൂട്ടിയ ദി ഗ്രേറ്റ് ഫാദർ, അബ്രഹാമിന്റെ സന്തതികൾ എന്നീ സിനിമകൾക്ക് ശേഷം മമ്മൂട്ടി – ഹനീഫ് അദേനി കൂട്ടുകെട്ട് വീണ്ടും ഒന്നിക്കുന്ന ചിത്രമാണ് ‘അമീർ’. ബിഗ് ബജറ്റിൽ ഒരുങ്ങുന്ന ഈ ചിത്രത്തിന്റെ പ്രീ പ്രൊഡക്ഷൻ ജോലികൾ പുരോഗമിക്കുകയാണ്. പതിനെട്ടാം പടി, മാമാങ്കം, ഗാനഗന്ധർവൻ തുടങ്ങിയ മമ്മൂട്ടി ഇതിനകം ഡേറ്റ് നൽകിയ ചിത്രങ്ങൾ പൂർത്തിയാക്കിയ ശേഷമായിരിക്കും മെഗാസ്റ്റാർ ഈ ചിത്രത്തിൽ ജോയിൻ ചെയ്യുക. ഹനീഫ് അദേനി തിരക്കഥയൊരുക്കുന്ന ഈ ചിത്രം വിനോദ് വിജയനാണ് സംവിധാനം ചെയ്യുന്നത്.റിപ്പോർട്ടുകൾ പ്രകാരം ദുബായിലെ അധോലോക രാജാവായി ഒരു പുതിയ ഗെറ്റപ്പിലാണ് മമ്മൂട്ടി ചിത്രത്തിൽ എത്തുന്നത്. അമീറിന്റേതായി പുറത്തിയ ടൈറ്റിൽ പോസ്റ്റർ സോഷ്യൽ മീഡിയകളിൽ തരംഗം സൃഷ്ടിച്ചിരുന്നു. ഹനീഫ് – മമ്മൂട്ടി കൂട്ടുകെട്ട് ബോക്സ് ഓഫീസിൽ വീണ്ടും കോടികളുടെ കിലുക്കം സൃഷ്ടിക്കുമോ എന്ന് കാത്തിരിക്കുകയാണ് സിനിമാലോകം.
